Bi jardunaldi falta dira binakako txapelketako ligaxka bukatzeko, baina ez dute emoziorik izango. Izan ere, Elezkano II.a-Rezustak 22-9 irabazi diete Laso eta Albisuri Tolosan, eta horiek biak sailkatzeko aukerarik gabe gelditu dira. Gauzak hala, egun lehen lau postuetan dauden bikoteak matematikoki sailkatuta daude: Elezkano II.a-Rezusta, Altuna III.a-Martija, Olaizola II.a-Imaze eta Ezkurdia-Zabaleta. Finalerdiak hiru aste barru hasiko dira, enpresa bereko bikoteen arteko partidekin.
Lasok eta Albisuk gaur zuten txapelketari helduta jarraitzeko aukera, deus ere jokoan ez zuen bikote baten aurka, baina ez dira ongi aritu. Elezkano II.ak eta Rezustak askoz hobeto ekin diote partidari (6-4tik, 14-4ra), aurrelariak bereziki, eta ondo kudeatu dute alde hori amaierara arte.
Markagailua: 0-1, 1-1, 2-1, 2-2, 6-2, 6-4, 14-4, 14-5, 15-5, 15-7, 16-7, 16-8, 17-8, 17-9 eta 22-9.
