Bolada eskasari ezin izan dio Eibarrek amaiera eman Vila-Realen aurka. Partida zoragarririk jokatu gabe, eskura izan dute armaginek gutxienez puntu bat urratzea, baina etxekoek gol bakarra behar izan dute hiru puntuak eskuratzeko.
Atzean sartuta izan da Eibar lehen zatiko une askotan, baina eutsi die Vila-Realen erasoaldiei. Bigarren zatian heldu da lehiako gol bakarra. Vietto sartu berria zen zelaian, eta hark 71. minutuan eginiko jaurtiketa batek besazpitik egin dio ihes Irureta atezainari. Azken minutuetan Vila-Realek aukera izan du aldea handitzeko, baina Iruretak bikain gelditu du etxekoen ahalegina.
Bost jardunaldi daramatza Eibarrek punturik urratu gabe. 11. postuan da, 27 punturekin. Hiru euskal taldeak bata bestearen atzetik daude markagailuan -hamargarren Reala, hamaikagarren Eibar eta hamabigarren Athletic-, hirurak 27na punturekin.
