Ligako titulua bosgarren aldiz irabaztear da Athletic. Bartzelonaren aurka jokatuko du; lehen sailkatua, bigarrenaren kontra. Irabaztea edo berdintzea nahikoa izango dute zuri-gorriek txapeldun izateko. San Mamesen jokatuko dute bihar, zaleen babesa bilatzeko. Bete egingo da zelaia.
Arrate Oruetaren bosgarren liga titulua eta Irene Paredesen lehena izan daiteke, eta Athleticeko bi jokalariekin hitz egin du BERRIAk. "Tituluren bat irabazi dutenek euren esperientzia kontatzen dizute, eta, egia esan, horrelakoak bizitzeko gogoa sortzen dizute", dio Paredesek.
Oruetak gogoan du San Mamesen jokatuta irabazi zuten aurreneko titulua: "35.000 zalerekin, boom baten gisakoa izan zen San Mamesen jokatu genuen lehen aldia. Orain ere jende asko inguratzea espero dut".
BERRIAk bihar argitaratuko du bi jokalariekin eginiko erreportajea.
