Mimo handiz prestatu zuela aitortu zuen, eta ez zen ari gezurretan. Bradley Wigginsek (Britainia Handia) irabazi du urrezko domina Munduko Txapelketako gizonezkoen erlojupekoan, Tony Martin faborito nagusiari (Alemania) 26 segundo aterata. Lehen erreferentzian bakarrik zen aurretik alemaniarra, hiru segundoko aldearekin, baina behetik gorako saioa egin du gero britainiarrak. Tom Dumoulinek (Herbehereak) irabazi du brontzezko domina. Wigginsek baino 41 segundo gehiago behar izan ditu 47,1 kilometroko ibilbidea egiteko.
Euskal herritarrei dagokienez, indarrean hasi arren nahi baino saio apalagoa egin du Markel Irizarrek, eta 34. postuan amaitu du, azkenean, Wigginsengandik 3.39 minutura. Jonathan Castroviejok, berriz, behetik gorako erlojupekoa egin du, eta 10. amaitu du, irabazlearengandik 1.44ra.
