Kito. Amaitu da sasoi honetan Euroliga Caja Laboral Baskoniarentzat. Eta amaitu, azken bost urteetan bezala amaitu da: Lauko Finalerako erdibidean. CSKA Mosku izan da oraingoan Gasteizko taldeari bidea moztu diona, orain hiru urte egin bezala. 3-1 nagusitu da orain ere CSKA, gaur laugarren partidan 85-94 irabazi ondoren.
Lehen zatia parekatua izan da (34-36), baina bigarren zatiaren hasieran kolpea eman du CSKAk, eta hamalau puntuko zuloa egin (38-52). Hamabost puntukoa ere izan dute (68-83), baina azken laurdenean susperraldia izan du Baskoniak, eta hiru puntura jarri da (82-85). Teodosicen hiruko baten erabakita utzi du partida. Epaileek, gainera, zorrotz epaitu dituzte Baskoniaren jokaldiak, eta horrek sutu egin ditu etxekoak. Horrek teknikak adieraztea ekarri du, eta CSKAk aldea handitzea.
