Caja Laboralek Pape Sow pibot senegaldarra fitxatu du

Caja Laboral Baskoniak baieztatu duenez, gaur goizean Pape Sow pibot senegaldarra fitxatu dute, eta azterketa medikuaren zain, Gasteizko taldean jokatuko du aurrerantzean. 1981eko azaroaren 22an Dakarren jaioa, 2,08 da luze, eta bere fitxaketarekin Stanko Barac pibota ordezkatzeko jokalaria bermatu nahi izan du Baskoniak. Bizkaia Bilbo Basket eta Zalgirisen aurka Baracek derrigorrez jokatu behar izan du, nahiz eta eskuin belaunean min izan. Sowk Meridiano Alacant taldean jokatzen zuen orain arte, eta ekainaren 30era arte zuen kontratua. Taldeak beretzat lekurik ez dagoela iritzita utzi diote Euskal Herrira etortzen, Martin Rancik eta Kenny Hasbrouck fitxatu berri baitituzte. Alacanteko taldean denboraldi honetan jokatu dituen hamar partidetan 98 puntu lortu ditu eta 53 errebote jaso ditu.