Carod-Rovira NOBeko buruarekin bilduko da, "Kataluniako kirolaren nazioarteko aitortza" lortzeko

Josep Lluis Carod-Rovira Kataluniako Generalitateko presidenteordea eta ERCko lehendakaria, Jacques Rogge Nazioarteko Olinpiar Batzordeko (NOB) buruarekin bilduko da, "Kataluniako kirolaren nazioarteko aitortza" lortzeko asmoz. Helburu hori erdiesteko "bideak topatzeko", proposamena egingo dio, baina ez du horren argibiderik eman; hala ere, Carod-Rovirak esan du proposamena ez dagoela Kataluniako selekzioen aitortzarekin lotuta.

Martxoaren 13an batzartuko dira, Lausanan (Suitza), NOBen egoitzan. Efe berri agentziak dioenez, Juan Antonio Samaranch NOBeko presidente ohiaren bitartekaritzari esker lortu du Carod-Rovirak elkarrizketa hori.