Kostatzen ari zitzaion, baina atera du arantza Mark Cavendishek (Etixx). Andre Greipelen (Lotto) azken metroekin, etaparik irabazi ezinda zebilen britainiarra, baina garaipen ederra lortu du gaur, Tourreko zazpigarren etapan, esprint nahasian. Lottok lehenengo eta Katuxak gero, ondo bideratu dute esprinta, baina azken unean atzetik aurrera eginda, den-denak mendean hartu ditu Etixxeko esprinterrak. Greipel sailkatu da bigarren eta Peter Sagan (Tinkoff) hirugarren.
Esprintaren aurretik, Kristjian Durasek (Lampre), Luis Angel Mate (Cofidis), Anthony Delaplace, Brice Feillu (Bretagne) eta Daniel Teklehaimanot (MTN) ibili dira ihesean, baina tropelak kontrolpean izan ditu une oro, hiru minutu eta erdiko aldea izan dutelako gehienez. Roazhon (Rennes) eta Mur artean, zortzigarren etapa jokatuko da bihar, 181,5 kilometrokoa. %6,9ko batez besteko aldapa daukate azken bi kilometroek.
