Kolpez jositako etapa izan da Italiako Giroko hamargarrena. Mikel Landaren (Sky) erretiroarekin hasi da, 66. kilometroan. Gastroentiritisak jota, ezinean gelditu da lehen mendatean bertan, eta zazpi minututik gorako galera pilatuta zeukala etsi du. Aurreko etapetako joerari segika, Tom Dumoulinen (Giant) ezina agertu da gero, eta denbora asko galdu du azkenerako. Eta ordurako ihesaldia osatuta zela, Stefano Pirazzik (Bardiano) Damiano Cunegori (Nippo-Vini Fantini) hamabost kilometro falta zirela jaitsiera batean emandako ukitua baliatu du Giulio Cicconek (Bardiani) erasoa jo eta etapa irabazteko. Pirazzi, Ciccone eta Cunego ihesean zihoazen, tropela hiru minututik gora zutela —beste hainbat txirrindulari zihoazen tartean—, eta bihurgune bateko ukitu hori erabakigarria izan da azkenean.
Faboritoen artean, berriz, Andrey Amadorrek (Movistar) erasoa jo du Pian del Falcon behera, eta liderraren maillota janzteko zorian egon da. Azken kilometroan ezerezean gelditu da, ordea, aldea. Gianluca Brambilla liderrak (Etixx) gogotik lan egin behar izan du Bob Jungels taldekidearen alde, eta, Brambilla lehertuta gelditu den arren, Jungels jarri da lider. Faborito nagusien artean ez da izan ia alderik. Modenan hasi eta Asolon amaitu, 11. etapa jokatuko dute bihar, 227 kilometrokoa. Igoera gogorrik gabe ere, gorabeheratsua da amaiera.
