Ciudad Realen jokatuko du San Antoniok gaur, eta Arratek, Torrevellan

Aurkari zaila egokitu zaio Amaya San Antoniori Asobal ligako zazpigarren jardunaldian: Ciudad Reali eginen dio bisita gaur (20:45). Juanto Apezetxearen jokalariek ez dute aurkaria ezustean harrapatzeko aukera baztertzen, eta Bartzelonaren aurka egin zuten partida kontuan hartuta, ez fidatzeko arrazoiak baditu Ciudad Realek. 25-26 galdu zuten nafarrek azken jardunaldian kataluniarren aurka. Balentria egiteko zorian izan ziren. Zazpigarren dira sailkapenean, sei punturekin.

«Bartzelonaren aurkako partidak indarberritu gaitu; badakigu hagitz zaila dela, baina partidan sartu, eta punturen bat lortzeko aukerak sortu nahi ditugu», erran du Apezetxeak. Urdiales jokatzeko moduan izanen da, herenegungo entrenamenduan hatz batean kolpea hartu arren. Rasic, Meoki, Borragan eta Vargas ere ariko dira, nahiz eta arazo fisikoak izan.

Arratek, bertzalde, Torrevellaren pistan jokatuko du gaur (20:45). Ez da pista erraza. Arratek, gainera, denboraldia hasi zenetik, agerian utzi ditu golak egiteko dituen zailtasunak. Gol gutxien lortu duen taldea da, une honetan, Ligan. Arazo hori konpondu beharko du, sailkapenean aurrera egin ahal izateko. Hamahirugarren postuan da Eibarko taldea, hiru punturekin.

Ivan Sever pibotak, ziurrenik, Arraterekin debuta egiteko aukera izanen du gaur, denboraldia hasi zenetik min hartuta egon baita. Osatu da, azkenean, eta baliteke hainbat minutu aritzea.

Aurkari samurra

ABF ligari dagokionez, Itxako Monovarren kontra ariko da gaur (19:00), bere pistan, igandean Txapeldunen Ligako partida baitu. Atseden hartzeko denbora gutxi dute Lizarrako jokalariek, beraz. Min hartuta ziren guztiak, gainera, oraindik ez dira osatu. Naiara Egozkuek bere bizkarreko arazoekin jarraitzen du, eta, ondorioz, Leire Aramendiak beteko du haren tokia. Baliteke, halaber, bertze hegalean Amaia Azanza aritzea, Jessica Alonsok edo Carmen Martinek atseden hartzeko.