Ihesaldia eta faboritoen arteko lehia. Beste behin ere, bitan banatu da Tourra, 14. etapan. Hogei txirrindulariko ihesaldia sortu da aurrean, eta Croix Neuve gogorrean gora zatitu da taldea. Romain Bardet (Ag2r) izan da indartsuena igoeran, baina mendiko pankartapera bidean atzetik iritsi da Thibaut Pinot (FDJ.fr), eta bi frantziarrak elkarrekin iritsi dira azken kilometrora —aldapa behera—. Elkarri begira geratu dira, ordea, eta Steven Cummingsek (MTN) lapurtu die garaipena.
Atzean, berriz, mugitu egin da Nairo Quintana (Movistar) eta ezinean geratu da Chris Froome (Sky). Vincenzo Nibali (Astana) eta Alejandro Valverde ere (Movistar) britainiarra atzean utzita ibili dira, baina Tourreko liderrak hainbestean konpondu du egoera, azken esprintean Quintanari berari buruz burukoa irabazita. Alpeetara begira, ordea, dezenteko konfiantza izango du orain Quintanak. Tejay Van Garderen (BMC) izan da galtzaile nagusia, Froomengandik 40 segundora helmugaratuta. Sailkapen nagusian, Froome dago lider, 3.10era dago Quintana, 3.32ra Van Garderen eta 4.02ra Valverde.
Mende eta Valence artean, 15. etapa jokatuko da bihar, 183 kilometrokoa. Ihesaldiaren baimenarekin, esprinta izan daiteke amaieran.
