Denboraldiko lehen puntuak eskuratzeko erronka dauka gaur Lagunak-ek

Ez golik eta ez punturik. Lagunak erabat ezinean dabil denboraldi honetan, eta, ohartzerako, zulo-zuloan sartuta dago. Nafarrek galdu egin dituzte ligako lehen bost partidak; golik sartu ez, eta hemezortzi jaso dituzte. Besteren artean, 5-0 galdu zuten Athleticen aurka, eta 9-0 Rayoren aurka. Ez dira zenbaki onak. Aldaketa handi samarra izan du taldeak; entrenatzaile aldaketa ere izan zuten azken unean, eta burua altxatu ezinik dabiltza Barañaingoak. Ezinak ahaztuta, ordea, aukera polita daukate gaur denboraldiko lehen puntuak eskuratzeko. Sant Gabriel izango dute aurrean, sailkapeneko hamargarren sailkatua (11:00).

Erabat bestelako egoeran Athletic dago. Ligako lehen lau partidak irabazi dituzte zuri-gorriek, eta sailkapen buruan daude, Rayorekin berdinduta. Collerenseren aurka ariko dira gaur (11:30), aurkari zuzenak Levanteren aurkako partida zaila daukala jakitun. Reala, berriz, Valentzian ariko da (12:15).