Amaitu da ibilbide olinpiarra Maria Lopez de Egilaz hockey jokalari donostiarrarentzat eta Rocio Ibarra bilbotarrarentzat. Ozta-ozta lortu zuten final laurdenetara igarotzea, eta bertan, Erresuma Batuak kanporatu du Espainiako selekzioa. Edonola, zortzigarren postuan amaitu dute txapelketa bi euskal kirolariek, eta, beraz, diploma lortu.
Oker hasi da partida Ibarra eta Lopez de Egilazentzat, lehen laurdena amaitzerako bi golen desabantaila baitzuten markagailuan. Georgina Twiggek zazpigarren minuturako jarri ditu aurretik britainiarrak, eta 13. minutuan aldea handitu du Helen Richardson-Walshek.
Ez dira gauzak zuzendu bigarren laurdenean, eta Erresuma Batuko selekzioarentzat hirugarren gola egin du Lily Owsleyk 26. minutuan. Partida berdintzeko denborarik gabe, ohorearen gola lortu du 52. minutuan Georgina Olivak Espainiako selekzioarentzat.
