Dominen borrokan sartu nahi du gaur Castroviejok

Gizonezkoen 23 urtez azpiko errepideko lasterketa jokatuko da gaur Varesen (Italia), Munduko Txapelketan, eta bertan ariko da Jonathan Castroviejo bizkaitarra. Hamar itzuli emango dizkiote 17,3 kilometroko zirkuituari, eta 173 kilometro egin beharko dituzte denera. Itzuli bakoitzean bi aldapa etzan igo beharko dituzte -%6koa da gehienezko pendiza-. Amaierara arte tropel nagusian iraunez gero, aukera polita eduki dezake gaurko lasterketan Castroviejok.