Golak 0-1: Kikek (9. min); 0-2: Kikek (38. min); 1-2: Adayk (55. min.); 1-3: Joan Jordanek (ñ0. min.) 1-4: Inuik (ñ9. min.).
Jose Luis Mendilibarrek urtebeterako berritu du kontratua aste honetan, eta bere jokalariek partida oso ona jokatuta eskertu diote sinadura. Eibarrek ez du erakustaldirik eman, eta amaierako aldea handiegia da zelaian ikusitakoarentzat, baina argitasun eta ofizio handiz jokatu du, eta horregatik irabazi dio 1-4 Gironari. Garaipen honekin 47 puntu ditu eta gertuago dago lehen hamarren artean bukatzea, taldeak bere buruari jarri dion helburua alegia.
Montiliviko bi zatiek antz handia izan dute. Eibarrek ondo hasi ditu biak, lehen hamabosna minutu onekin. Gero Gironaren hogei minutuko agintea etorri da, eta bi zatietan Eibarrek ondo kudeatu du une txar hori. Amaitu, aldiz, Eibarrek hobeto bukatu ditu biak, horren erakusgarri 38., ñ0. eta ñ9. minutuetan sarturiko golak. 0-1ekoa, dena den, hasi eta berehala sartu du. Gironaren huts abaliatu eta Inui eta Dani Garcian jositako kontraerasoa Kike Garciak baliatu du. Girona zazpigarren izateko lehian dago, eta galtzen hasi izanak urduritu egin du. Eibarrek ondo zaindu du golaren osteko oldarraldia, eta korner batean sartu du 0-2koa. Berriz ere Kike Garciak, buruz.
Eibarrek emaitza alde zuen, eta kudeatzen saiatu da, baina Gironak aldea murriztu du korner batean. Jokaldi landua Adayk baliatu du. Eibar estu zen, baina ez du gehiegi sufritu. Ofizioa erakutsi du, eta argitasuna, 1-3koa Inuik oso bizkor ateratako falta baten ondorio iritsi baita. Lo harrapatu du Gironaren atzeko lerroa eta Jordanek sartu du 1-3koa. Gol horrek etxekoak jota utzi ditu, eta hori baliatuz sartu du Inuik 1-4koa.
