Elurtearen ondoren, Albasini

Elurte handi samarraren beldurrez, Erromandiako Tourreko antolatzaileek erabat laburtu zuten atzo lehen etapa, eta 88,5 kilometroko esprint txiki batean, Michael Albasini (Orica Greenedge) izan da azkarrena, Sionen. Labur-laburra eta mugitua izan da etapa. Vincenzo Nibalirena (Astana) izan da mugimendurik serioena, Lens bigarren mailako mendatean behera, eta tropelak helmugara iristeko kilometro eta erdi falta zela harrapatu du italiarra. Thomas Voeckler (Europcar) mugitu da gero, kilometro bakarra falta zenean, baina garaizegi mugitu da frantziarra, eta indarrik gabe geratu da azken 200 metroetan. Azkenerako, nagusitasunez irabazi du Albasinik, Jesus Herradari (Movistar) aurrea hartuta. Michal Kwiatkowskik (Omega) jarraitzen du lider. Sion eta Montreux artean, bigarren etapa jokatuko da bihar, 166,5 kilometrokoa. Chatel Saint Denis (81,8. km) eta Peney le Jorat (121,4. km) hirugarren mailako mendateak igo beharko dituzte tartean.