Erantzun aparta eman, eta berriro zuzeneko txartela eskuratzeko lehian sartu da

Frantziako D2 Mailan (Bigarren Maila) tinko eta egoskor dihardu Baionak, eta hamargarren jardunaldia jokatuta, hirugarren postura aupatu da berriro.Sailkapen ligaskan lehen postuan amaitzen duenak Top 16rako txartela bereganatuko du zuzenean. Bestetik, aurreneko lau sailkatuek finalerdietarako urratsa egingo dute.

Hortaz, bistan da bide egokian dihardutela baionarrek. Sasoiaren hastapenean ez zuten pentsatzen zuzenean Maila Nagusira igotzeko txartela eskuratzea, aitzineko lauren artean sartzea baizik. Baina taldearen erantzuna ikusita, edozer gauza gerta liteke. Larunbatean, urrun joan gabe, ederki atera zuen arantza. Izan ere, aurreko asteburuko partida azken unean galdu zuen Oyonnaxen, eta amorruz itzuli ziren lapurtarrak.Larunbatean, Auch lider sendoa hartu zuten mendean (23-8), eta ligako zazpigarren garaipena erdietsi zuten. Oraindik ez dute etxean galdu, eta horrek indarra eman dio taldeari. Auch taldea sendoa eta indartsua da aitzin multzoan, baina hain justu, arlo horretan nagusitu zen Baiona. Lehen zatian 14-3 aitzineratu ziren baionarrak, Labordek eginiko entsegua baliatuta. Gainerako puntuak, Lamaison internazional ohiak egin zituen jaurtiketetan. Larretxeak gibelean jokatu zuen Haizagirreren lekua betetzeko.Orain, Munduko Kopa jokatzen aritu den hiru laurdenetako jokalari batekin indartuko dute lerro hori:Eskoziako McLarenekin. Eskoziarrak ez du minutu asko jokatu Mundialean, baina Baionak badu bere beharra.