Erlojupekoan sailkapena iraulita, Nibalik irabazi du Tirreno Adriatikoa

Amaiera harrigarri samarra izan zuen atzo Tirreno Adriatikoak. Christopher Horner (RadioShack), Roman Kreuziger (Astana) eta Vincenzo Nibali (Liquigas) sei segundoren jiran iritsi ziren 9,3 kilometroko erlojupekora. Eta sailkapenean hiruretatik urrutien zegoenak eman zuen kolpea, Nibalik. Erlojupeko ona egin zuen italiarrak, eta Fabian Cancellararekiko (RadioShack) hogei segundo besterik ez zituen galdu helmugan. Askoz apalago ibili ziren liderra eta Kreuziger. 40 segundo galdu zituen estatubatuarrak, eta 47 Kreuzigerrek. Lau-laua zen erlojupekoa, baina espero baino alde handiagoak izan ziren faboritoen artean.

Larunbatean Peter Sagan taldekidearekin izandako liskarraren ondoren —etapa garaipena eskura zeukanean, azken metroan aurreratu zuen—, merezitako garaipena eskuratu zuen atzo Nibalik. Italiarrarengandik hamalau segundora geratu zen azkenean Horner, eta 26ra Kreuziger. Atzoko erlojupekoan Jon Izagirre (Euskaltel-Euskadi) izan zen euskaldunik onena, 51. postuan, Cancellararengandik 45 segundora, eta sailkapen nagusian ere ormaiztegiarra izan da onena, 16. postuan, Nibalirengandik 3.01 minutura.

Denboraldi honetan hirugarren garaipena du jada Nibalik: Omango Tourreko bosgarren etapa eskuratu zuen lehenengo, eta Tirreno Adriatikoko bosgarren etapa eta sailkapen nagusia iritsi dira atzetik. Milan-San Remo dauka begiz jota orain.