ERRUGBIA . Baiona Akizen ariko da; sutsua izango da lehia

Baionak xantza polita galdu zuen joan zen larunbatean Frantziako D2 Ligako sailkapeneko buruan bakarrik geratzeko, ados egin baitzuen Oyonnaxekin (22-22), Baionan. Kosta ahala kosta lehen postuan amaitu nahi dute lapurtarrek sailkapen fasean, horrek Maila Nagusira jauzi egiteko txartela emango dielako zuzenean. Bestela, finala jokatu beharko lukete, gutxienez.

Baionarrek 26. jardunaldiko partida jokatuko dute Akizen (Landak), gaur 17:30ean, Maurize Boyau zelaian. Baiona lehen postuan da Auchekin batera (61 puntu). Bigarren Lyon da (58 p.) eta laugarren Akize (55 p.). Sailkapen fasea amaitzeko bost jardunaldi geratzen dira, eta Arroxela (bosgarren) zortzi puntura dutenez baionarrek, ia ziurtaturik dute finalerdietako txartela.Baionak Galesko Daniel Griffiths fitxatu zuen gibelean dituen hutsuneak arintzeko. Dena den, Lamaisoni uste baino arinago osatu zaio sorbaldako lesioa eta bere kabuz entrenatzen hasia zen joan zen astean. Akizen aritzeko nahia zuen internazional ohiak. Pierre Bouisset Baionako Teknikariak, ordea, nahiago du Akizeren aurka ez jokatzea, eta tira-birak sortu dira.Joaneko partidan 21-19 irabazi zion Baionak Akizeri, eta ohiko ikusmina baino handiagoa sortu du lehiak. Akizek ezin du galdu eta Baionak gorantz egin nahi du. Baionako jokalarien zerrenda: Dabbadie, Salles, Aletti, Healy, Mitchell, Cleda, Tewhata, Massabeau, Lamour, Tilloles, Combes, Sudre, Larretxea, Laborde, Aussel, MacLaren, Leger, Martin, Larralde, Jonnet, Abbadie, Taofifenu eta Viol.

Yachvilli, Chouchan eta Puleoto ez dira ariko Tolosan

Miarritzek bihar jokatuko du Top 16ko azken partida, Tolosako Ernest Wallon zelaian (16:45). Asteazkenean galdu egin zuten miarriztarrek Montpellierren kontra: 17-23, eta haserrea sortu zuen. Beraz, sendabiderik egokiena Tolosan ongi jokatzea da. Azkenaldian lesioak dira kezka eta horrela izango da bihar ere. Yachvilliri ebakuntza egingo diote, Chouchanek belauneko bihurdura ukan zuen asteazkenean eta Puleotok uzkurdura bizkarrean.