ESKUBALOIA. Riverok eta Iakimovitxek senda-agiria jaso dute, eta bihar joka dezakete

ERREDAKZIOA - IRUÑEA@:Gezurra badirudi ere, albiste onak daude Portlanden, lesioei dagokienez. Izan ere, Vladimir Riverok eta Mijail Iakimovitxek senda-agiria jaso zuten atzo, eta litekeena da biek Iruñeko taldeak bihar Vigon (Galizia) Pilotes Posadasen aurkako partida jokatzea. Atezain kubatarrak iragan urriaren 4an hartu zuen min, Valentziaren aurkako lehian. Rivero atearen kontra joan zen, eta eskuineko eskuko hatz txikia hautsi zuen. Kubatarrak hurrengo lehia jokatu zuen, (Bartzelonaren aurka), estalki batekin, baina hurrengo lau partidak, Asobal Ligako eta Europako Errekopako bina, galdu egin zituen. Javier Miguel Akerreta Portlandeko sendagileak atzo azpimarratu zuenez, «Riveroren lesioak hobera egin du, eta Pilotesen aurkako partida jokatzeko moduan dago. Hala ere, estalki txiki bat erabili beharko du, arazorik gabe geldi dezakeela jakin arte».

Iakimovitxek, aldiz, hiru partida galdu ditu: Teucroren aurka Asobal Ligan, eta SKA Minsken aurka Europako Errekopan. Ukalondoan izan du mina ezker alboko bielorrusiarrak, baina badirudi lesioaz osatu dela. Zupo Ekisoainek nahi izanez gero, jokatzeko moduan da.

Itxakok irabazi eta Bera Berak galdu ABF Ligan

ABF Ligako zazpigarren jardunaldia jokatu zuten asteburuan Itxakok eta Bera Berak. Nafarrek eta gipuzkoarrek zorte oso bestelakoa izan zuten. Itxakok garaipen ona lortu zuen Kanaria uharteetan, Ro'Casaren aurka: 23-25. Atzoko partida irabazi ondoren, Lizarrako taldea bosgarren da sailkapenean: hamar puntu. Ferrobus Mislata da liderra, zazpi partidak irabazi baititu: 14 puntu.

Bera Berak, berriz, galdu egin zuen, El Osito L'Eliana talde handiaren aurka:17-23 Donostiarrek ondo jokatu zuten, baina ezin izan zioten Valentziako taldearen kalitateari aurre egin. Atzoko porrrotaren ondoren, Bera Berak bi postu galdu ditu sailkapenean, eta seigarren da orain: bederatzi puntu.