Irujok eta Barriolak binakako txapelketako finalerdietako lehen partida irabazi dute gaur (22-8), Urrutikoetxea eta Beroizen aurka.Aspekoak nagusi izan dira eta bukaerako emaitzak ondo islatzen du kantxa gainean egon den aldea. Irujok oso ondo jokatu du, eskuinez min handia eginez -—14 tanto egin ditu jokoan—. Ezker eskuko arazoek bere parte hartzea kolokan jarri zuten eta badaezpada ere babestu egin du, sotamano eta bolea bortitzik jo gabe. Jokaldi horietan Abel Barriolak bizkartzain lan ona egin du. Leitzarrak txapelketako partidarik onenetarikoa jokatu du.
Urrutikoetxeak eta Beroizek, aldiz, irudi kaskarra eman dute. Atzelariak batez ere, gozakaitz ibili da —5 huts egin ditu—. 10-2 galtzen hasi eta ez dute bururik altxa. Asegarcekoek bi partidak galdu dituzte eta dagoeneko ezinezko dute finalean sartzea.
Olaizola II.a-Aretxabaletaren aukera
Bigarren finalerdia igandean jokatuko da, Donostian, Olaizola II.a-Aretxabaletak eta Xala-Zubietaren artean. Olaizola II.a-Aretxabaletak irabazten badute finalean dira
Partidako datuak:
Iraupena.48.49.
Pilotakadak. 440.
Saketik. Irujok 2; Urrutikoetxeak alerik ez.
Markagailua. 0-1, 1-1, 3-1, 3-2, 10-2, 10-3, 11-3, 11-4, 15-4, 15-5, 16-5, 16-6, 19-6, 19-8 eta 22-8
Bestelakoak. 1.000 ikusletik gora Labrit pilotalekuan (Iruñea). Apustuak doblean irten ziren gorrien alde.
