2009an Valentzian (Herrialde Katalanak), 2012an Madrilen eta 2015ean Bartzelonan Athleticek eta Bartzelonak elkarren aurka jokatutako Espainiako Kopako finaletan, txistu egin zioten bi taldeetako zaleek Espainiako ereserkiari —beste horrenbeste egin zuten 2017an Alavesek eta Bartzelonak Madrilen jokatutakoan—. Larunbat honetan, ordea, ez da zalerik izango bi taldeek Sevillan (Espainia), La Cartuja estadioan jokatuko duten Kopako finalean.
Hala ere, Kataluniako Selekzioaren Aldeko Plataformak dei egin du Espainiako ereserkiak irauten duen bitartean jendea balkoietara atera dadin eta txistu egin dezan. Kataluniako eta Euskal Herriko Independentziaren aldeko aldarrikapena izango da, Bi herri, helburu bat: independentzia lelopean. Ernaik bat egin du ekinaldiarekin. 21:30ean hasiko da finala, eta Espainiako ereserkia minutu batzuk lehenago jarriko dute estadioko bozgoragailuetan, Felipe VI.a Espainiako erregea iritsi bezain pronto.
2015ean, Espainiako Fiskaltza Santiago Espot txistualdiaren sustatzaile Catalunya Accioko presidentea kondenatzen saiatu zen, Espainiako Koroari irain egin ziola argudiatuta. Hasieran, 7.200 euroko isuna jarri zion Espoti, baina 2018an Espainiako Auzitegiak absolbitu egin zuen, ekintza adierazpen askatasunaren babespean egin zela argudiatuta.
