Espainiako Gobernuak 19 euskal federazioren aurkako helegiteak sartuko ditu

Paulino Luesma Espainiako Gobernuak EAEn daukan ordezkariak Estatuaren Abokatuari hemeretzi euskal federazioren estatutuen kontrako helegiteak sartzeko agindu dio, estatutuok "Espainiako araudiaren kontra" doazela iritzita.

Txirrindularitza, karate, kirol egokitua, eskubaloia, herri kirolak, atletismoa, igeriketa, borroka eta samboa, halterofilia, gimnastika, surfa, hipika, triatloia, automobilismoa, errugbia, judoa, xakea, ur jokoak eta olinpiar tiroko federazioak dira hemeretzi horiek.

Luesmaren ustez, estatutu horiek Araba, Bizkai eta Gipuzkoako Kirolaren Legean oinarritzen dira, eta gogoratu du Espainiako Gobernuak lege horren kontra Auzitegi Konstituzionalean helegitea sartua duela, "euskal kirolari estatuko eta nazioarteko ordezkaritza eman nahi diolako". Horrek Espainiako Konstituzioaren 149-1-3 artikulua urratzen du, haren arabera. Arauak Espainiako Estatuari ematen dio kanpo harremanetarako eskumen osoa. Auzitegi Konstituzionalak EAEko Kirolaren Legeak euskal federazioen ordezkaritzaz dioen artikulua bertan behera utzi zuela esan du, bide batez, Luesmak, eta bere lurraldera mugatzen duela.