Pozik dago Alex Txikon mendizalea Laila Peak mendian egindako lanarekin, baina, batez ere, behe kanpalekura onik iritsi delako. Neguan Karakorumeko Laila Peak mendira igotzen lehena izan da, Jose Fernandezekin batera. Lehenengo ekinaldia eta bigarrena batuta, hamabi egun pasa ditu bizkaitarrak behe kanpalekutik kanpo.
"Josek hiru behatz dauzka pixka bat izoztuta; eta normala den bezala, pisua galdu dugu, baina, eskaladak suposatu duena kontuan hartuta, okerragoa izan zitekeen". "Gailurrera iristeko azken metroekin batera, jaitsieran sufritu dugu gehien. Gailurretik bigarren kanpalekurako ibilbidearen erdia gauez egin genuen, eta tentsio handiko uneak izan ziren; benetako beldurra pasa dugu une batzuetan", azaldu du mendizaleak.
