Estreinaldia, atzeratuta

Lau t'erdiko Txapelketak azken orduko atzerapena izan du. Gasteizko Ogeta pilotalekuan dena prest zenean, eta txapelketako lehen lehia jokatzear zela, Sebastian Gonzalez ezin izango da estreinako partidan aritu Mikel Urrutikoetxearen aurka. Osasun arazoak direla medio, Azkainekoak partida atzeratu behar izan du. Ondo bidean, Urrutikoetxea eta Gonzalezen arteko lehia datorren larunbatean jokatuko da, bertako irabazleak Bengoetxea VI.aren aurka aritu beharko baitu urriaren 21ean. Aldaketa horren ondorioz, Saralegi eta Albisuren artekoa astelehenera atzeratuko litzateke: urriaren 15era.

Ogeta pilotalekuan aukera ederra zegoen gaur partida erakargarri bat ikusteko. Izan ere, esperientzia eta gaztetasuna irudikatzen duten bi pilotari ziren aritzekoak aurrez aurre. Urrutikoetxeak duela bi urte egin zuen debuta lehen mailan; hain zuzen ere, Gonzalezek lau t'erdiko lehen txapela irabazi zuen urte berean. Hiru urtez lau t'erdikoan ibili ostean, bizkaitarrari gehiago eskatzen dio jendeak. Joan den denboraldiko datuak hobetu dituen arren, pilotazaleek azken pausoa eman dezala eskatzen diote. 2009. urtean bigarren mailako lau t'erdikoa lortu eta gero, Urrutikoetxeak lehen kanporaketan duen aukeraz baliatu nahi du.

Aurrez aurre Gonzalez izango du. Azken hilabeteotan ez da fin ibili Azkainekoa, baina 2010eko denboraldian irabazitako txapela berriz lortzeko helburuarekin sartu da txapelketan. Hala ere, azken unean izan dituen osasun arazoek zer-nolako ondorioak utziko dizkioten ikusi beharko da.

Lau t'erdiko Txapelketako lehen kanporaketa, beraz, ez da gaur jokatuko. Gonzalez eta Urrutikoetxearen atzeratzearen ondorioz, Olaizola I.ak emango dio hasiera txapelketari, Aritz Lasa eta Idoate-Merino II.a partidan irabazle ateratzen den pilotariaren aurka. Azken horiek bart ziren jokatzekoak, Margutebeko frontoian (Santo Domingo, Espainia). Bertako irabazleak Aritz Lasaren aurka jokatu beharko du, igandean, Eibarko Astelena pilotalekuan.