Uste baino larriago, uste baino lan gehiago eginda, baina Giant-Shimanok irabazi du Giant-Shimanorena zen etapa. Hasi eta bukatu gogotik lan egin behar izan du John Degenkolben taldeak, eta alemaniarrak ez du hutsik egin gero. Hori bai, azken kilometroan bertan geratu da ezerezean Rohan Dennis (BMC) eta Elia Favilliren (Lampre) ahalegina —ihes eginda ibili dira Bob Jungels (Trek), Lluis Mas (Caja Rural) eta Daniel Teklehaimanot ere (MTN-Qhubeka)—. Bost iheskideek lau minutuko aldea izan dute gehienez, gogotik estutu dute tropela, baina gehienetan gertatzen dena gertatu da Coruñara bidean ere. Esprinterren taldeen kontrolaren ondoren —amaieran lan dotorea egin du Warren Barguilek (Giant-Shimano)—, esprinta eta Degenkolben garaipena, aurtengo Vueltako laugarrena.
Estradan hasi eta Monte Castroven amaitu, hemezortzigarren etapa jokatuko da bihar. Gorabeheratsua da amaiera, azken 30 kilometroetan sartuta bi aldiz igoko dutelako Monte Castrove bigarren mailako mendatea. 6,5 kilometro eta %7ko batez besteko aldapa dauzka igoera horrek.
