Amaitu da Xakhtar Donetsk eta Realaren arteko partida. Irabazi beharra zeukaten txuri-urdinek Europako lehiaketaren batean jarraitzeko aukera izateko, baina 4-0 galdu dute donostiarrek. 37. minutuan jaso du lehen gola, korner batean. Xakhtarrek lo harrapatu ditu Realeko jokalariak, motzean atera dute ukrainarrek korner hori, eta Luiz Adrianok lortu du 1-0ekoa. Bigarren zatia hasi berritan, Alex Teixeirak lortu du 2-0ekoa, Iñigo Martinezen eta Ansotegiren arteko huts larrian. Eta Douglas Costak sartu ditu azken bi golak.
Lehen gola jaso aurretik Realarena izan da baloia. Velarenak izan dira partidako lehen bi jaurtiketak, baina Alex Teixeirak eman du gero lehen abisu serioa, area barruan bertan baloia jaso eta jaurtiketa ona eginda. Bravok urrundu du kornerrera. 18. minutuan area barruan bakarrik geratu da Bernard, baina brasildarrak huts egin du errematean. Erasoan arrisku sentsazio handia eduki du Realak hasiera horretan, baina Cadamuroren hegaletik, bereziki, sufritzen ari da taldea atzean. 28. minutuan huts larria egin du atzelariak, eta 1-0ekoa lortzeko zorian egon da Xakhtar, baina jokoz kanpokoa adierazi du epaileak. 36. minutuan, berriz, Srnak langara bidali du falta jaurtiketa. Eta hurrengo minutuan iritsi da Luiz Adrianoren gola, talde guztiaren huts larrian. 41. minutuan Douglas Costa egon da 2-0ekoa sartzeko zorian, baina geldiketa bikaina egin du Bravok. Eta motzean ateratako korner batean Iñigo Martinezek eduki du gertu berdinketa, Cadamuroren erdiraketa batean, baina, oso gutxigatik bada ere, gora joan da ondarroarraren errematea.
Aldaketarik gabe hasi da bigarren zatia, eta berehala jaso du Realak 2-0ekoa. Alex Teixeirak sartu du bigarren gola. Hiru gol behar dituzte txuri-urdinek aukerei eusteko. Izugarri sufritu ondoren, Griezmannek zutoinera bidali du errematea 55. minutuan, Xabi Prietok, Velak eta frantziarrak berak egindako jokaldi onean. 68. minutuan, kontraeraso onean, Douglas Costak sartu du 3-0ekoa, area ertzetik jaurtiketa bikaina eginda. Eta brasildarrak berak lortu du 4-0ekoa ere, 87. minutuan, talde guztiaren jokaldi onean. Realak jada ez dauka aukerarik Txapeldunen Ligan aurrera egiteko, eta ezingo du jokatu Europako Liga ere.
Ondorengoak izan dira hamaikakoak:
Xakhtar Donetsk: Piatov; Srna, Kucher, Rakitski, Xevtxuk; Stepanenko, Teixeira, Fred; Douglas Costa, Luiz Adriano eta Bernard.
Reala: Bravo; Cadamuro, Ansotegi, Iñigo Martinez, De la Bella; Elustondo, Pardo, Xabi Prieto; Chory Castro, Griezmann eta Vela.
