Europan hasitako bideari eutsi nahi dio Athleticek Ligan

Athleticek denboraldiko lehen txaloak jaso ditu Slovanen kontra Europako Ligan eginiko lanagatik. Zuri-gorriek merezita irabazi zuten, aurkaria baino lan hobea eginda, alegia. Badirudi urrun geratu direla Rayoren kontrako partidan entzundako txistuak. Baina jakinekoa da futbolean goitik behera aldatzen direla gauzak egun batetik bestera. Neurketa batetik bestera, zehatzagoa izanda. Partida bakoitza azterketa bat da. Athleticen kasuan ez da gutxiago. Azken norgehiagoka nota onez gainditu zuen. Baina askok uste dute azterketa erraza izan zela. Aurkariak ez zuela asko estutu. Neurri batean, Marcelo Bielsak ere onartu du hori. «Orain arteko partida guztiak irabazteko modukoak izan dira. Ikusi egin beharko dugu nola erantzuten dugun maila hobeagoko taldeen kontra», adierazi zuen atzo.

Denboraldia luzea da, eta egongo da azterketa gaitzei aurre egiteko aukera. Baina inork ez dezala zalantzan jar irabazi beharreko partidetan lortutako puntuak direla talde batek galdu ezin dituenak. Hala lortu zuen Joaquin Caparrosek entrenatzen duen taldeak seigarren izatea —sailkapenean aurretik geratu ziren taldeen kontra galdu egin zituen neurketa gehienak—. Gaur gisa horretako beste neurketa bat dauka Athleticek. Bigarren jardunaldiz jarraian igo berri den talde baten kontra lehiatuko baita. Betisek bisitatuko du San Mames. Igo berria bai, baina gauzak txukun egiten ari dena ere bai. Pepe Melek seriotasuna eraman du sarri askotan ganora gutxi izan duen taldera. Eta emaitzak hor daude. Bi partida, eta beste horrenbeste garaipen. Erne, beraz. Betisen Athleticekin harremana izan duten hiru futbolari daude: Ustaritz, Beñat Etxebarria eta Goitia. Atzelaria utzita ari da jokatzen. Gaur ez da ariko, Athleticek ez diolako uzten. Euskarriak, berriz, ezin izan zuen lehen taldean jarraitutasuna izan. Lezama utzi behar izan zuen bere balioa erakusteko. Baita lortu ere. Eta atezainaren kasuan, behin baino gehiagotan egon da talde zuri-gorriaren agendan, baina sekula ez dute fitxatu. Gaur ez du jokatuko.