Vela eta Jonathasen jokaldiari esker, laugarren garaipena eskuratu zuen atzo Realak, Athletici 0 eta 1 irabazita. 17. minutuan heldu zen gola. Ezker hegalean Velak baloia jaso, eta pase bikaina emanez, bakarrik utzi zuen Jonathas Iraizozen aurrean. Haren jaurtiketa ezin izan zuen gelditu Athleticeko atezainak.
Bigarren zatian ahalegindu zen Athletic galdutako denbora berreskuratzen, baina ez zuen lortu nahi zuenik, eta ondorioz, etxean galduta, atzera egin du talde zuri-gorriak Europarako bidean. Aldiz, eta denboraldia amaitzeko 13 jardunaldi geratzen direnean, hiru puntura dute Europarako txartela Eusebio Sacristanen mutilek.
Izan ere, partida irabazita 33 puntu dituzte txuri-urdinek, eta 9. postuan dira. Athletic, berriz, zortzigarren da 35 punturekin.
