ESAIT Euskal Selekzioaren Aldeko Iritzi Taldeak, CAT Kataluniako plataformak eta Siareiras Galizakoak Euskal Herriko, Kataluniako eta Galiziako selekzioak aldarrikatu dituzte gaur Madrilen, Espainiako Kongresuan, hiru herrialdeek, "nazio historiko" gisa, horretarako eskubidea dutela iritzita.
Prentsaurrekoan Amaiur (Xabier Mikel Errekondo eta Rafa Larreina), CiU (Marta Surroca, Eva Parera, Josep Maldonado eta Jordi Jane), ERC (Joan Tarda, Alfred Bosch eta Teresa Jorda), ICV (Joan Coscubiela eta Laia Ortiz) eta BNGko (Olaia Fernandez) parlamentarien babesa jaso dute. Ondoren, elkarrekin argazkia atera dute Kongresu atarian. ESAITetik Iñigo Santxo eta Martxel Toledo izan dira.
"Ofizialki lehiatzea kirolarien eskubidea da eta euren federazioetako ordezkariek nazioarteko federazioen baitan egoteko aukera izan behar dute", esan dute ESAIT, CAT eta Siareirasek, eta "beto eta traba politikoak" desagertzeko eskatu dute. Haien arabera, Espainiako Gobernuak eragozpenak jartzen ditu.
Ostiralean Athletic-Bartzelona Espainiako Kopako finalean Euskal Herriko eta Kataluniako selekzioen aldeko aldarrikapena egiteko eskatu dute plataformek.
