Euskal taldeek hiru domina lortu dituzte gaur goma gaineko munduko txapelketan. Badaiotzek urrea irabazi du emakumezkoen 500 kilokoan, eta Beti Gaztek, berriz, brontzea. Gizonezkoen 600 kilokoan, Beti Gaztek eta Ibarrak elkarren aurka jokatu dute brontzezko dominarengatik, eta nafarrek irabazi dute.
Meritu handiko urrea lortu du Badaiotzek, Taiwango Jingmei taldeari irabazi baitio finalean, eta Jingmei zen munduko azken txapelduna.
Irlandako Letterkenny herrian ari dira jokatzen munduko txapelketak. Bigarren eguna bete dute gaur, eta etzi bukatuko dira. Guztira zortzi dira euskal taldeek irabazi dituzten dominak: urrezko bi (Badaiotzek), zilarrezko bi (Beti Gaztek) eta brontzezko lau (Beti Gaztek bi, eta Gaztedik eta Ibarrak bana).
Bihar herrialdekako lehia hasiko da: 09:30ean, gizonezkoen 680 kilokoa, emakumezkoen 540 kilokoa eta 23 urtez beherakoak; eta 12:30an, gizonezkoen 560 kilokoa eta 580 kiloko mistoa.
