Faboritoa eta besteak

Urtero bezala, Urrezko Kopa bihar jokatuko dute Donostiako Trinitate plazan, arratsaldeko 19:30ean. Legeak agintzen duenbezala, azkeneko Euskadiko Txapelketan lehen bost postuetan geratutako aizkolariak ariko dira nor baino nor gehiago: Floren Nazabal, Luis Txapartegi, Joxemari Olasagasti, Iñaki Azurmendi eta Joxe Lopez de Azpilikueta. Nazabal da txapela irabazteko hautagai nagusia, azkeneko urteetan hura ari baita izaten jaun eta jabe egur gainean. Iaz ere, hark jaso zuen Urrezko Kopako trofeo astuna. Gainerako aizkolariak, baina, sasoi onean daude, eta ezustekoa ematen saiatuko dira.

Aizkolariek 14 pago kanaerdiko ebaki beharko dituzte, lan luzea, ezbairik gabe. Horrek are faboritoago egiten du Etxarri-Aranazko aizkolaria. Izan ere, lan luzean motzean baino hobeto moldatzen da, eta aurkariei irabazteko aukera gutxiago ematen die. Fisikoki ondo prestatutako aizkolaria da, eta beste asko baino gazteagoa da, gainera. Erritmo bizian ekiten dio probari hasiera-hasieratik, eta bikain eusten dio horri proba osoan. Hasieran aurretik hasten bada, ia ezinezkoa izango da hura aurreratzea. Olasagasti ere sasoi onean da azkenaldian, eta ahalik eta lanik onena egitea du helburu. Duela bi urte txapeldun izan zen Igeldokoa, eta berriro ere lehen postua eskuratzeko gogotsu dago. Baliteke bi aizkolari horien artean egotea txapela.

Gainerako hiru aizkolariak oso txukunak dira, eta beti ematen dute eurena. Lopez da, agian, txapelketetan aurreko postuetan gehien ibiltzen dena. Azurmendik ere badu aizkorarako gaia eta kemena, eta duela hiruzpalau urte bikain aritu zuen. Azkenaldian, baina, ez dabil nahi bezain ondo, eta bihar lan ona egin eta bere buruarekin gustura gelditzea du helburu. Txapartegi, azkenik, esperientzia handiko aizkolaria da, hainbat eta hainbat plazatan ibilia baita, eta eskarmentu hori baliatzen saiatuko da aurkariak menderatu asmoz.

Marken ikusmina

Urrezko Kopak beti sortzen du ikusmin berezia, markak direla-eta. Bihar jokatuko den proban zaila izango da marka historikoa hobetzea, baina Nazabalek Arrospide berdindu dezake garaipen kopuruan. Leaburuko aizkolaria da Urrezko Kopa gehien irabazi dituena, guztira bost. 1991 eta 1994 bitartean lau irabazi zituen, eta, bi urte geroago, bosgarrena. Nazabalek, berriz, lau ditu. Etxarrikoak, baina, aukera asko ditu Arrospideren marka berdintzeko. Arrospidek jada ez du lehia honetan parte hartzen, eta Nazabalek beste hainbat urtean jarraituko du Urrezko Kopan. Beraz, baliteke urte gutxi barru Etxarrikoarena izatea errekorra.

Bada beste marka bat, baina, oso zaila izango dena hobetzea. Aditu askoren ustez, ia ezinezkoa. Izan ere, Donato Larretxeak 27:17 minutuan ebaki zituen hamalau kanaerdikoak 1995ean. Denbora harrigarria, zinez. Nazabalek iaz egin zuen denborarik onena, 30:31, Larretxeak baino hiru minutu pasa gehiago behar izan zituen. Horrek erakusten du zein zaila den marka hori hobetzea.

Irabazleak

URREZKO KOPA

2008. Floren Nazabal 30:31

2007. Joxemari Olasagasti 31:34

2006. Floren Nazabal 31:47

2005. Floren Nazabal 38:57

2004. Floren Nazabal 35:28

2003. Joxe Miel Peñagarikano 37:01

2002. Donato Larretxea 29:03

2001. Joxe Miel Peñagarikano 27:34

2000. Joxe Miel Peñagarikano 29:04

1999. Joxemari Olasagasti 27:39

1998. Antonio Senosiain 30:00

1997. Donato Larretxea 29:22

1996. Angel Arrospide 29:11

1995. Donato Larretxea 27:17

1994. Angel Arrospide 28:34

1993. Angel Arrospide 27:53

1992. Angel Arrospide 27:39

1991. Angel Arrospide 28:20

1990. Joxemari Olasagasti 31:41

1989. Donato Larretxea 35:09