Felixek atzeratu egin du erretiro eguna, eta Urrezko Xistera jokatuz esango du agur

Kirol ibilbideari agur esan behar dion unean pilatu zaizkio arazoak Felix Espillari. Munduko Pilota Batzarraren binanako txapelketan hartu zuen min, finalerdietan. Finala jokatzea erabaki zuen, baina ez zuen bukatzea lortu, erabat eten zelako ongien ari zenean. Bazituen hainbat konpromiso bere agurrerako hitzartuak, baina herenegun egin zioten erresonantzia, eta zuntz haustura dauka izterraren atzealdean. Guztiz osatzeko hiru edo lau aste beharko dituenez, ezinezkoa zitzaion agurrekoak jokatzea.

Master Jai enpresak, ordea, beste aukera bat eman dio Felixi: Urrezko Xistera jokatzea. Abendua eta urtarrila bitartean jokatzen da urtero. Felixek erabat osatzeko aukera izango luke horrela, eta jokatuz agur esateko aukera ere bai. «Ez nuen nahi jendeak pentsatzea min hartuta nagoelako erretiratzen naizenik», nabarmendu zuen atzo Espillak berak. «Orain, ganoraz esango dut agur».