Festa giroan egingo du urteroko aldarrikapena ESAITek, Areatzan

ESAIT Euskal Selekzioaren Aldeko Iritzi Taldeak festa giroan pasatuko du gaurko eguna, aldarrikatu nahi duten hori ahaztu gabe, noski; adin guztietakoentzako ekitaldiak antolatu ditu Bilbon, Areatzan, goiz-goizetik hasita. 11:30ean, esaterako, Pirritx eta Porrotx pailazoak izango dira. Bi dira, baina, nabarmendu beharreko ekitaldiak. Arratsaldeko ordu batean adierazpen bat irakurriko dute euskal selekzioaren ofizialtasunaren alde. Kiroleko, gizarteko, politikako eta erakundeetako hainbat ordezkarik hartuko dute parte bertan. Iluntzeko zazpietan, berriz, urteroko legez, manifestazioa abiatuko da Areatzatik Indautxura, Indarrak bilduz, ofizialtasuna lelopean. Zelaira joaterik ez duten horientzat pantaila handi bat jarriko du ESAITek Areatzako karpan.