Marcel Kittelek irabazi zuen azken etapa, esprintean. Pariserako bidean zehar hasi ziren ospakizunak txirrindularien artean, baina ikuskizun berezi bat egin zuten antolatzaileek itzuliaren ehun urteak ospatzeko.
Christopher Froomek aurreneko aldiz irabazi du Frantziako Tourra, eta Miguel Indurain, Bernard Hinault eta Eddy Merckxen eskutik jaso zuen maillot horia —itzulia bost aldiz irabazia dute horiek—. Froomek hartu zuen hitza, eta esan zuen ez zaiola "ezer" aldatuko bizitzan, eta oroitarazi du "hautsez betetako errepideetan" hasi zela bizikletan ibiltzen, Kenian.
Garaipena errepikatzeko asmoa adierazi zuen Froomek: "28 urte ditut, eta, nire ustez, txirrindulari gehienek 30 urte inguruan dute sasoirik onena. Gustatuko litzaidake hona itzuli eta ahalik eta titulu gehien lortzea".
Nairo Quintana Movistar taldeko txirrindularia eta Joaquin Rodriguez Katuxakoa izan zituen ondoan podiumean Froomek. Egundoko itzulia egin du Quintanak, bigarren postua, mendiko maillota eta txirrindulari gazte onenaren saria eskuratuta.
Bestalde, Mikel Nieve Euskalteleko txirrindularia izan da euskal txirrindularien artean onena, 12. postuan.
