Fuenlabradak baino estuago hartuko du Joventutek gaur Caja Laboral

Hain joko itsusia egin eta tituluren bat lortzen badu, inork ez du ezer esango. Baina merezi du joko politagoa egiten ahalegintzea; eraginkortasuna galdu gabe, noski, baina zentzu handixeago erabilita. Dusko Ivanovicen arabera, jaurtiketetako portzentaje txarrari zor zaio Fuenlabradaren aurkako partidako joko kaskarra, baina asteazkeneko Caja Laboralek urrikoa edo azarokoa zirudien: hirukoak bota eta bota besterik egiten ez zuen taldea, saskipeko jokoa erabili gabe ia-ia.

Hirukoetan %27 sartu zituen azken neurketan. Portzentaje hori %37koa izan balitz, inork ez zuen ezer esango, baina ez zuen lortu. Eta lortuko duen ziurra ez denez, beste aukera batzuk bilatzea komeni, Joventutek ez duelako batere erraztasunik emango. Etxean jokatuko du hark, eta Kopa jokatzeko duen aukera apurra baliatu nahiko du. Azken jardunaldian Real Madril ahaltsua menderatu zuen, etxean, defentsan asko estutuz, eta arratsaldean ere antzeko bilakaera izan dezake partidak. Arlo horrek zalantza gutxiago eragiten du Gasteizen, Baskonia oso lan ona egiten ari baita zaintza alorrean.

Matt Walsh fitxatu berria taldearekin joango da, baina ez da ziurra kantxaratuko den. Apenas egin ahal izan duen lan saiorik, eta sistemak barneratzeko tarte txikia da hori. Walshek eskarmentu handia du, dena den, eta, jokatzen duena jokatzen duela, ondo egin dezake, nahastu gabe.

JOVENTUT-CAJA LABORAL

Txapelketa. ACB ligako 15. jardunaldia.

Joventut. Oliver, Jeter, Van Lacke, Jelinek, Ventura, Barrera, Obasohan, Llovet, Baez, Williams, Trias eta Norel.

Caja Laboral Baskonia. Prigioni, Heurtel, Oleson, San Emeterio, Walsh, Nemanja Bjelica, Teletovic, Milko Bjelica, Golubovic eta Dorsey.

Sailkapena. Baskonia laugarren postuan da: 11-3 (+82); Joventut, 14.ean: 5-9 (-60).

Lekua. Olinpiar pabiloia(10.700 ikusle).

Ordua. 18:00 (Teledeporte).