FUTBOLA. ESPAINIAKO LIGA. ANDER MURILLO. ATHLETICEKO JOKALARIA. «Etxetik kanpora, aurrera egiteko beldurra dugula dirudi»

Zelaitik kanpo baino gurago du berdegune gainean hitz egitea. Ez dauka etorri handirik, baina gauzak argi ditu oso. Iaz eta orain urte bi une latzak bizi izan ostean, aurten hasi da futbolaz gozatzen. Valverdek bere aldeko apustua egin du eta zentralak ez dio huts egin.

UEFA ahaztu eta Ligan buru-belarri aritu beharra daukazue.

Besiktasen aurka galdu ostean, egoerari buelta eman behar diogu lehenbailehen eta partida irabazi behar dugu.

Athleticek bi aurpegi erakusten ditu. Etxean ondo ari zarete eta kanpoan txarto. Zergatik alde hori?

Etxean motibatuago zelairatzen gara. Kanpoan aurrera egiteko beldur gehiago dugula dirudi. Txipa aldatu eta argi izan behar dugu emaitza ona eskuratu dezakegula Levanteren aurka.

Konfiantza berreskuratzeko garaipen bat falta zaizue?

Duda barik. Etxetik kanpo puntuak irabaztea garrantzitsua izango da esnatzeko.

Levante da orain arteko ezusteko nagusia. Maila bikaina erakusten ari da.

Inork ez zuen espero Levante horren aurrean egongo zenik sailkapenean. Egun, edozein talde da indartsua etxean. Levante ere oldarkor zelairatuko da, baina guk ere argi izan behar dugu hiru puntuak irabaztea gura dugula.

Besiktasen aurka aulkian egon ostean, badirudi hasierako hamaikakora itzuliko zarela.

Ilusioa daukat. Teknikariak dauka azken berba, baina taldera itzultzen banaiz gauzak ondo egiten saiatuko naiz.

Aurten pozik egongo zara. Iazko arazo fisikoak gainditu dituzu eta partida onak ari zara jokatzen.

Fisikoki ondo nago eta ezin naiz kexatu, baina taldeak ez du bide egokia hartu Ligan. Jokoa baino, emaitzak izan dira txarrak. Ondo jokatu arren, puntu gutxi irabazi ditugu.

Levanteko aurrelariak sasoi betean daude. Sergio Garciak eta Mantxevek sekulako eragingarritasuna erakutsi dute.

Mantxev ez dut ezagutzen, baina Sergio aspalditik ezagutzen dut [behe mailako Espainiako Selekzioan sarritan jokatu dute elkarrekin]. Badakit nola jokatzen duen eta zer egiteko gauza den.