FUTBOLA. Etxeko ibilbidea zuzendu nahi du Eibarrek, Sporting historikoaren aurka

Etxean otso, kanpoan uso, dio esaera zaharrak. Bada Eibarri buruz hitz egiterakoan, alderantzizkoa esan beharko litzateke: etxean uso, kanpoan otso. Izan ere, hainbat jardunaldi daramatza Eibarrek etxetik kanpo galdu gabe, baina etxean...Jokatutako zazpi partidetatik bi bakarrik irabazi ditu. Azkena, joan den urriaren 23an Castelloren aurka (2-0). Gaur, Sporting izango du aurkari Ipuruan. Eibarrek ondotxo daki, mailari eusteko etxeko puntuak beharrezkoak direla.

Gainera erasoan garrantzitsuak diren bi jokalari bueltatuko dira hamaikakora. Azkoitia eta Asensio, hain zuzen. Iragan astean zigortuta zeudenez, ezin izan zuten Tenerifen jokatu. Bestelakoan, Carlos Terrazasek apenas egingo du aldaketarik. Hau da, Iñigok, esaterako, hasieratik jokatuko du gaurkoan ere. Gasteiztarraren golak behar ditu Eibarrek gora egiteko.Sportingei dagokionez, Eibarrek baino bost puntu gehiago ditu (20) eta hamargarrena da sailkapenean. Terrazasen ustez, «talde bortitza da». Halaber, aurkariaren historia aipatu zuen: «Jokalaria gehiago motibatzen da, talde garrantzitsu baten aurka jokatzerakoan». Sportingek urte mordoxka bat egin zituen Lehen Mailan.

EIBAR-SPORTING

Eibar: Etxeberria; Fagoaga, Cesar, Manuel, Manel; Markel; Solabarrieta, Asensio, Azkoitia, Jaime; eta Iñigo.

Sporting: Roberto; Sastre, Jorge, Juanmi, Dorado; Pablo Alvarez, Enguix; Javi Fuego, Pablo Lago, Gerardo; eta Karanka

Epailea: Mateu Lahoz (Valentzia).

Ordua: 17:00, Lekua: Ipurua. 5.200 ikusle