Eibarrek mailaz igotzeko behar duen karanbola oso erraza da azaltzen: Celtak edo Cadizek baino emaitza hobea behar du. Beste biek euren partidak irabazten badituzte, Eibarrek ez du igotzerik izango. Aldiz, Cadizek edo Celtak berdintzen edo galtzen badute, Eibarrek eskura izango du Lehen Mailako bosgarren euskal taldea izatea. Ipuruako harmailak lepo beteko dira gaur. Bi egun dira sarrerarik lortzea ezinezkoa dela eta harmailetan ez da eserleku hutsik ikusiko. Eibarrek urteko partidarik garrantzitsuena du Ferrolen aurka, eta ezin du zaleen aurrean hutsik egin. Gaurkoa, gainera, partida berezia izango da jokalari askorentzat, taldeari adio esango baitiote.
Mendilibar, mesfidati
Eibarrek ez luke arazo handirik eduki beharko Ferroli irabazteko. Galiziako taldeak ez du deus ere jokoan, eta normalean jokatzen ez duten bederatzi jokalari izango ditu hasierako hamaikakoan. Jose Luis Mendilibarrek, ostera, hiru jokalari garrantzitsuren falta izango du.Silvak, Moisesek eta Iñigok ez dute deialdian sartzerik izan. Hutsune horiek betetzeko, Varela eta Alberto Suarez sartuko dira hasierako hamaikakoan.
Eibarreko entrenatzaileak atzoko prentsaurrekoan esan zuenez, bere jokalariak ziur daude partida irabaziko dutela. Mendilibarren nahia jokalariek beste zelaietako egoera ahaztea eta arreta partidan bakarrik jartzea da. Celtaren eta Cadizen partidei buruz hitz egitean, berriz,diru sarien beldur dela aitortu zuen. «Xerez eta Cadizen arteko partida derbia da, eta Cadizek zail izango du irabazten. Kirolaz kanpoko zerbait dagoen ala ez gero ikusiko da. Irabazteko diru sariak daudela esaten dute, baina nork dio galtzeko ere ez daudela?».Era berean, Celtak gorriak ikusiko dituela aurreratu zuen, «ez dagoelako irabazteko mentalki prestatuta». Eibarrek arratsaldeko zortziak eta erdi aldera jakingo du bere historiako orrialderik gozoena gaur idatziko duen. Lehen Mailara igo zein ez, zaleek jokalariak txalotuko dituzte partidaren ostean, eta gaua oso luzea izango da denentzat.
-
Igoerako partidak
EIBAR-RACING FERROL
Mailaz igotzeko, Cadizek edo Celtak baino emaitza hobea behar du Eibarrek.
xerez-cadiz
Derbia da. Bi taldeetako zaleen artean liskar ugari egon dira. 10.000 zale joango dira Cadiztik.
lleida-celta
Celtak irabazten badu, mailaz igotzea ziurtatuko du. Lleidak ez du ezer jokoan.
