Bisita zaila zuen Athleticek zortzigarren jardunaldiko partidan, Atletico Madril liderra hartzen baitzuen etxean. Espainiarrak gehiago izan dira, eta hiru puntuak eraman dituzte. Hasi eta berehala jarri zaio partida maldan gora Athletici, hirugarren minuturako egin baitu lehen gola Alek. Bigarren zatian, Yulema Corresek egin du berdinketaren gola etxekoentzat, baina zortzi minutu geroago egin du Amandak garaipenaren gola. Partida bat gutxiago jokatuta, seigarren postuan da Athletic, hamahiru punturekin.
Oiartzunek ere ezin izan du punturik urratu. Hirugarren postuan den Valentzia izan du arerio Karla Lekuonan, eta bisitariek gol bakarra behar izan dute hiru puntuak eramateko. 77. minutuan Joycek eginiko golak ezerezean utzi du oiartzuarren ahalegina. 13. postuan da Oiartzun, lau punturekin.
Reala izan da esku hutsik geratu ez den euskal talde bakarra. Fundacion Albaceteren aurrean, berdinketa lortu dute donostiarrek. Lehen zatia golik gabe amaitu ostean, Bautistak aurretik jarri ditu etxekoak markagailuan. Beristainek egin du berdinketaren gola, 78. minutuan. Sei punturekin, hamargarrena da Reala.
