Atseden eguna da gaur Frantziako Tourrean, eta karreraren lehen hamar egunen balantzea egitea tokatzen da. Erorikoek baldintzatu dute aurten Tourraren hasiera, eta horien ondorioz hainbat korrikalarik utzi behar izan dute, tartean, zenbait faborito.
Atzo Vinokurovek eta Vandebroeckek utzi zuten lasterketa eroriko baten ondorioz. Horiez gain, Amets Txurruka ere (Euskaltel-Euskadi) Tourretik kanpo geratu da atzo 40. kilometroan erori eta erietxera joan behar izan ondoren. Eskuin lepauztaia du hautsita, eta hirugarren urtez karrera utzi behar izan du.
Juanma Garate Rabobank taldeko txirrindulari eta BERRIAko kolaboratzaileak ezin izan zuen atzo irteeran egon. Atzoko kronikan aitortzen zuenez, asteazkeneko erorikoak oinaze handia utzi dio, eta irteeran egon nahi zuen arren, ezin izan zuen; ez zuen gau osoan lorik egin eta dirudienez, pitzadura bat du sorbaldan.
Atzoko etapa, 208 kilometrokoa, Luis-Leon Sanchezek irabazi zuen. Euritsua izan zen, gogorra. Baina eguneko irudia Frantziako telebistako auto batena izan zen. Errepidetik kanpo gidatzen ari zela, zuhaitz batera gerturatzean, errepidera sartu eta Flecha (Sky) eta Hoogerland (Vacansoleil) eraman zituen aurretik. Tourreko zuzendariak barkamena eskatu du gertatutakoagatik.
