Hiru aste barru beteko da urtebete orduan Eibarreko entrenatzailea zenari, Gaizka Garitanori, prentsa aretoan kargu hartu ziotenetik euskarazko galdera bati euskaraz erantzuteagatik. Aulkitik altxatu eta joan egin zen Garitano, eta jende askoren babesa jaso zuen. Gaiak oihartzun handia izan zuen, The Guardian Erresuma Batuko egunkariak horri buruz idazteraino.
[Youtube]https://youtu.be/WkLr2hcVfxE[/Youtube]
Antza, irakaspenik ez zuten atera denek. Larunbatean Santiago Bernabeun Eibarrek Real Madrilen aurrean jokatu eta gero, prentsaurrekoa eman zuen estadio horretan Jose Luis Mendilibar Eibarren entrenatzaileak. Oraingoan ere, euskarazko galderari euskarazko erantzuna aurrena, eta gaztelaniazkoa ondoren.
Ez zuen begi onez ikusi Carmen Colino As egunkariko kazetariak. Twitterren idatzi zuen "errespetu falta" zela aurrena euskaraz erantzutea: "Hau Madril da, ez Eibar. Oso gaizki".
Me parece una falta de respeto que #mendilibar, tecnico del @SDEibar, primero conteste en euskera. Esto es Madrid no Eibar. Muy mal.
— Carmen Colino (@AS_CarmenColino) 2016(e)ko apirilak 9
Hainbat lagunek erantzun diote kazetariari; tartean, Eneko Andueza PSEko Gipuzkoako Batzar Nagusietako bozeramaileak: "Galdetu dioten hizkuntzan erantzun du. Badaude euskarazko hedabideak ere, eta zure tratu bera merezi dute". Beste hainbatek erantzun zioten ea gaizki iruditzen al zaion Zinedine Zidane Real Madrileko entrenatzaile frantziarrak Frantziako hedabideei frantsesez erantzutea.
