Gaur ere ezer ez Tourrean faboritoen artean

Frantziako Tourrak lehen etapetan izan zuen emoziorik, Lance Armstrongen eta Alberto Contadorren erasoekin, taldekako erlojupekoarekin ere bai -ehuneneko batzuengatik geratu zen Armstrong lider jarri gabe-, baina azkeneko astean ez da deus pasatu. Konturik nabarmenena, Levi Leipheimerren lesioa: gaur utzi du itzulia, eskumuturra hautsita.

Gaur etapa ona zeukaten sailkapen nagusian aurrean ibili nahi duten ziklista batzuek saioren bat egiteko, hirugarren mailako bi mendate zituztelako, bigarren mailako beste bi -azkena helmugatik hogei kilometrora- eta lehen mailako bat -helmugatik 61 kilometrora-. Euria ere egin du. Baina ezer ez.

Heinrich Haussler (Alemania, 25 urte) Cerveleko taldeko kideak irabazi du etapa, itzuliko 13.a: Vittel-Colmar (200 kilometro). Hasieran egin du ihes, beste kide batzuekin -haien artean zen Ruben Perez Euskaltel-Euskadikoa-, eta kilometroek aurrera egin ahala indartsuena eta errepide bustiarekin ausartena dela erakutsi du: bakarrik geratu da, eta garaile. Erraz, gainera; tropelak ez du estutu.

Aurten Paris-Nizako etapa bat eskuratu du Hausslerrek, 2007an Dauphine Libereko bat eta 2005ean Espainiako Vueltako bat; horiexek haren garaipenik handienak, orain arte.

Gaur bigarren Amets Txurruka (Euskaltel-Euskadi) heldu da bigarren, 4.10era, bera ere ihes eginda. Tropela 6.42ra iritsi da.

Rinaldo Nocentinik segitzen du Tourreko lider, Contador dago bigarren, Armstrong hirugarren.

Bihar korrituko dute 14. etapa: Colmar-Besançon (199 kilometro). Hirugarren mailako bi mendate izango dituzte, biak etaparen erdialdera.

Igandetik izango da berriro mendia. Hilaren 26an amaituko da itzulia, Parisen.