Gazteleku sasoiko hasi da

Aurreko ostiral gauean Euskal Herria astindutako zikloiak VI. BERRIA Txapelketa ere aztoratu zuen. Segurtasun arrazoiak zirela medio, bertan behera utzi zuten txapelketako antolatzaileek Txumulutxuetako eta Danok Lagunak taldeek Hernanin jokatu beharreko kanporaketa. Oraindik ziurtatzeko dago noiz jokatuko den kanporaketa, baina litekeena da bi aste barrurako antolatzea, Hernanin. Igandeko kanporaketa, berriz, jokatu egin zen, eta Gaztelekuk, Andoaingo taldeak, Arkupe kanporatu zuen, Gernikako taldea.

Arkupe 32

Gazteleku 66

KADETEAK

Arrizabalaga-San Sebastian 6

Ariztimuño-Ulanga 22

GAZTEAK

Iturbe-Irusta 16

Irastorza-Zendoia 22

NAGUSIAK

Soler-Arronategi 10

Eskudero-Loiola 22

Gaztelekuk aurten hartu du parte lehenbizikoz BERRIA Txapelketan, eta sasoiko ekin dio bideari, Gernikako Arkuperen aurkako kanporaketako hiru partidak irabazita. Kadete mailan Gaztelekukoak Gipuzkoako txapeldunak dira, eta tanto alde polita lortu zuten. Ulanga atzelariak agindu zuen piloteoan, eta sei tanto gehitu zizkion lan onari. Ariztimuño bikotekideak ondo baliatu zuen nagusitasun hori, eta tanto ugari egin zituen. Ezker bolearekin ibili zen bereziki trebe. Arrizabalagak, Gernikarren atzelariak, ahalegin handia egin zuen, baina ezin izan zuen emaitza itxuratu.

Gazte mailako partidan oreka izatea espero zen, baina Andoaingoek indartsu ekin zioten partidari, eta Zendoiaren jokoari eta Irastorzak saketik eginiko tantoei esker tarte handia ireki zuten (7-2 eta 17-7). Arkupeko bikotea Bizkaiko txapeldunordea zen, eta Irusta atzelariak lehia estutu zuen partidan sartu zenean (17-14). Oldarraldia, baina, motz gelditu zen, eta azken txanpan Andoaingoak nagusitu ziren berriz. Nagusi mailako partidan, azkenik, ez zegoen deus ere jokoan, eta hasiera estua izan bazen ere (7-9), hortik aurrera Gaztelekukoek zergatik ziren faborito erakutsi zuten. Loiolak atzean agindu zuen, eta Eskuderok ondo baliatu zituen aukerak.

Andoaingo seikoteak Galdakaoko Adiskide izango du kontrario hurrengo kanporaketan. Bizkaiko taldea txapeldun izan zen iazko BERRIA Txapelketan. Hurrengo asteburuan, berriz, bi kanporaketa jokatuko dira: Irurtzun eta Gasteizko Txukun Lakua ariko dira ostiralean (21:00), Hernanin; Usurbil eta Igorreko seikoteek jokatuko dute, berriz, larunbatean (11:00), Tolosan, Beotibarren.