Gogotik sufrituta nagusitu da Kaiku Galizian

Kaiku zen faborito, eta bizkaitarrek ez dute hutsik egin. Baina Jose Luis Kortaren taldeak ederki sufrituta irabazi du Sanxenxoko bandera, Galizian. Azken txandan aritu dira Kaiku eta Orio, Urdaibai eta Tiranekin batera, eta lehia estu-estua izan dute lehen biek. Azkenerako 2,26 segundo besterik ez dizkio atera Kaikuk Oriori. San Juan izan da hirugarren, bigarren txandan nagusituta, 7,20 segundora, Urdaibai laugarren, 7,58ra, San pedro bosgarren, 12,56ra, eta Hondarribia seigarren, 14,98ra. Behekaldean, egun txarra izan du Zumaiak, eta azken postuan amaitu du estropada. Castreñak, gainera, Zumaiaz gain, Pedreña ere atzeratu du Sanxenxon. Sailkapen nagusian, Kaikuk jarraitzen du buruan, 45 punturekin; 43 dauzka Oriok, 40 Urdaibaik, 31 San Pedrok, 29na San Juanek eta Tiranek, 25 Portugaletek, 24 Hondarribiak, 17 Astillerok, 13 Pedreñak, 12 Zumaiak eta 6 Castreñak. Galizian bertan jokatuko da bihar San Miguel ligako bosgarren estropada (12:00).