Golen batez bestekoa, txikiagoa

LABURRAK

- Undianok zuzenduko du Alemania-Serbia lehia. FIFAk bigarren jardunaldiko partidak zuzenduko dituzten epaileen zerrenda eman zuen atzo, eta Alberto Undiano Mallenco nafarrari D multzoko Alemania-Serbia neurketa zuzentzea tokatu zaio (ostirala, 13:30). 37 urte besterik ez dauka, baina azken urteotan nazioarteko partida mordoa zuzendu du.

- Ipar Korea animatu zutenak, aktoreak dira. Atzo Brasil-Ipar Korea partidan azkeneko selekzio hori animatu eta animatu jardun zuten hainbat lagunek, eta gaur jakin da aktoreak direla. Horretarako kontratatu zituen Ipar Koreako Kirol Batzordeak.

ESANAK

- Leo Messi (Argentinako jokalaria). "Gustatuko litzaidake Argentinak Bartzelonak bezala tratatzea".

- Diego Armando Maradona (Argentinako hautatzailea). "Mundiala irabazi nahi dut, eta Messi daukat. Lehen ez bezalako lidergoa du honek".

- Giorgio Chiellini (Italiako jokalaria). "Ea osatzen den Buffon. Hura da gure liderra eta bizkarrezurra".

- Deco (Portugalgo jokalaria). "Queirozek esan zidan eskubiko hegalera joateko, baina nik inoiz ez dut hor jokatu, ez naiz hegalekoa. Eta aldatu egin ninduen".

- Raymond Domenech (Frantziako hautatzailea). "Sufritu nahi ez badugu, Mexikori baloiaren monopolioa kendu beharko diogu".

DATUAK

- Golen batez bestekoa, txikiagoa. Lehen bost jardunaldietako golen batez bestekoa beste Munduko Kopakoetakoa baino txikiagoa da: 23 gol, partidako 1,64. Duela lau Hego Korea-Japonian garai berean 2,52koa zen, 1998an Frantziako Estatuan 2,67koa, 1994an AEBetan 2,71koa, 1990ean Italian 2,21ekoa. Handiena, 1982an, Espainiako Estatuan: 2,81ekoa.

- FIFAk 36 emakume kaleratu ditu. FIFAk Herbehereak-Danimarka partida ikustera joandako 36 emakume kaleratu zituen herenegun Johannesburgoko Soccer City estadiotik, "Munduko Koparen babeslea ez den enpresa baten publizitatea egiten ari zirelako ezkutuan". Segurtasun agenteek estadiotik bultzaka atera zituztela adierazi dio emakume horietako batek The Star egunkariari. Soinean zeramaten laranja kolore jantzia, Bavaria garagardo enpresak aupatutako kanpaina batean emandako oparia zen.