Goma gaineko txapelketak oraindik ez dira amaitu

Goma gaineko sasoia amai dadin, oraindik hiruzpalau txapelketa geratzen dira; hots, Ipar Euskal Herriko Txapelketa, Nafarroakoa eta Munduko Jokoetakoa. Ipar Euskal Herrikoari dagokionez, joan zen ostiralean hasi zen, Donibane Lohizunen, baina aurreneko bi saioak taldeak finkatzeko eta osatzeko izango dira. Horiek biak jokatu ondoren hasiko da berezko xapelgoa.

Nafarroakoari dagokionez, maiatzaren hasieran ekingo diote lehiari, lehen asteburuan segur aski. Hilabete bat iraungo du, hor nonbait. Gizonezkoetan lau talde dira aritzekoak eta kolokan dago Beti Gazteren esku-hartzea. Emakumezkoetan, berriz, bik eman dute izena oraingoz.Munduko Jokoak Alemanian izango dira aurten, abuztuan. Lau urtez behin jokatzen dira, eta sokatira ere gonbidatuta dago. Olinpiar Jokoetan esku hartzerik ez duten kirolak izaten dira ikusgai, eta horietako bat sokatira da. Orain dela lau urte, 2001ean hain zuzen ere, Japonian jokatu ziren, Akitan. Orduan gizonezkoetan eta emakumezkoetan jardun zuten euskal tiralariek, Espainiarekin, eta aski ezaguna da han gertatutakoa.Harrezkeroztik, aski bihurria gertatu da TWIFFen eta euskal sokatiraren arteko harremana. Aurtengo Munduko Jokoetarako izango da Espainiako talderen bat gonbidatua, baina, iazko Munduko Txapelketan gertatutakoa aintzat hartuta, edozer gauza gerta daiteke. Izan ere, TWIFFen esanetan, negargarria izan zen gizonezkoen 560 kiloko finalean Espainiak erakutsitako lehiakortasun eza; hori adierazi zuen bederen orduan. Espainiaren izenean, jakina, euskal tiralariak aritu ziren.Bestalde, aurten ez da jokatu goma gaineko Munduko Txapelketa. Lur gaineko Europakoa jokatuko da irailean, eta hori ere mintzagai izango da hemendik aurrera; hau da, zenbat talde joango diren, bidaiak prestatu, diru kontuak eta abar. Baina betiere euskal taldeek esku hartuko duten edo ez aintzat hartuta.Aldez aurretik, ordea, Euskadiko Txapelketa jokatuko da, eta finkatzen ari dira egutegia.