Gonzalezek eta Laskurainek irabazi dute Ipar Kutxa torneoko finala (16-22)

Ikusgarria ez, baina oso gogorra bai. Gonzalezek eta Laskurainek gogotik lan eginda irabazi zuten atzo Ipar Kutxa torneoko finala, Olaizola I.a eta Mendizabal II.aren aurka (16-22). Bero egiten zuen atzo Tolosako Beotibar pilotalekuan, eta partida bera ere oso luzea eta gogorra izan zen. 2-1ekoan salbu, irabazleak aurretik izan ziren partida guztian (3-5, 5-8, 10-13, 11-15...). Olaizola I.ak eta Mendizabal II.ak, hala ere, piloteoan nagusitu eta 15na berdindu zuten partida. Baina amaiera aldera behera egin zuten gorriek. Irabazleek Mendizabal II.a nekarazi zuten hasieratik, eta amaieran jaso zuten lan horren fruitua.