Sei urteko ibilbidea egin du Gorbeia Suzien mendi lasterketak, eta denbora horretan lasterketa txiki bat izateari utzi eta Europako txapelketako egoitza izatea lortu du. Iaz hartu zuen Europako txapelketa, Sky lasterketa moldean.
Antolatzaileen esanetan, "oso pozik" daude egindako lanarekin "Gure hizkuntza, kultura zein ingurunea, Gorbeia, Zeanuri eta Arratia, Europaren begiradapean" jartzea lortu dutela nabarmendu dute.
Suzien mendi taldeak antolatu du lasterketa, Zeanuriko Udalaren laguntzarekin. "Zenbait arrazoirengatik", 2018an probarik ez dela izango jakitera eman dute gaur antolatzaileek, eta eskerrak eman dizkiete herritarrei, parte hartzaileei eta babesleei.
