Saltsa handia izan da Emakumeen Biran, amaiera-amaieran. Megan Guarnier (Boels Dolmans), Emma Johansson (Orica), Ashleigh Moolman (Bigla) eta Katarzina Niewiadoma (Rabo Liv) ihesean zihoazela, okerreko bidetik sartu dira laurak helmugara iristeko lau kilometro eskas falta zirela, eta lasterketa geratu behar izan dute antolatzaileek. Okerra egin aurreko aldeak errespetatuta, lehengora itzuli dute egoera, eta Guarnier izan da azkarrena esprintean. Liderra 1.37 minutuko atzerapenarekin zela, Niewiadoma abiatuko da bihar maillot horiarekin. Denbora berean dago Moolman, bi segundora Johansson, eta zazpira Guarnier.
Maruri eta Fruiz artean bigarren etapa jokatuko da bihar, 82,2 kilometrokoa. Libao hirugarren mailako mendatea igo beharko dute helmugara iristeko zortzi kilometro pasatxo faltako direnean.
